Kann jarðhiti nýtast í Føroyum?

Jarðfeingi ger í hesum døgum kanningar, sum skulu vísa, um jarðhiti kann nýtast til upphiting av húsum. Eitt svenskt borifelag er í ferð við at bora tey fyrstu royndarholini, tvey í Havn og eitt á Tvøroyri.

Í næstu viku koma fólk frá Tekniska Universitetinum í Lund í Svøríki at gera hitamátingar í hesum holum. Úrslitini av mátingunum skulu vísa, um grundarlag er fyri at fara víðari við kanningunum. Um tað vísir seg, at hitaframleiðslan úr holunum er ov lítil til upphitingarendamál, verður verkætlanin steðgað, og ein vísindalig frágreiðing skrivað. Vísa kanningarnar hinvegin, at nóg mikið av orku fæst úr holunum, verður beinanvegin farið víðari at bora fleiri hol.

Ætlanin við hesi kanningini er at veita jarðhita til seks hús. Talan er um nýggj hús og eldri hús í ymsum støddum, vald á slíkan hátt at holini eru í bæði ovastu-, mið- og niðastu fláum.


Hitapumpur verða nýttar at flyta hitaorku úr berginum inn í húsini. Fyrimunir við jarðhita eru: 1) Hægri nyttustig, tí rímuliga støðugt hitastig er í jørðini alt árið 2) Tekniska útgerðin er undir jørð og inni í húsinum og harvið vard móti veðri. Av tí sama hvørki sæst ella hoyrist útgerðin í nærumhvørvinum.


Um alt gongur eftir ætlan, eru hitapumpur settar upp og farnar at virka í royndarhúsunum í august/september mánaða. Jarðfeingi fer við mátingum at fylgja gongdini nøkur ár fram í tíðina. Væntandi ber tó til eftir hálvum til einum ári at staðfesta, um grundarlag er fyri at nýta jarðhita í Føroyum. Tey, ið ætla at nýta jarðhita til upphiting, fáa tí væntandi møguleika til hetta í fyrru helvt av 2009.