Forkanningarvirksemi

Eitt forkanningarloyvi gevur rætt at gera ymiskar jarðfrøðiligar kanningar, ið verða nýttar sum grundarlag fyri seinni leitingum eftir og møguligari framleiðslu av olju og jarðgassi.

Eitt forkanningarloyvi kostar 75.000 kr. árliga. Har afturat tekur Jarðfeingi eitt umsitingargjald - 10.000 kr. - fyri viðgerðina av hvørjari umsókn.

Forkanningarloyvið gevur ikki rætt til at útvinna olju ella gass. Jarðfeingi fær avrit av øllum kanningarúrslitum til viðgerðar og varðveitslu.

Fyri sum minst at órógva gýtingarstovnarnar og fiskiveiðu eru seismiskar kanningar á havøkinum kring Føroyar avmarkaðar til ávís tíðarskeið á árinum.

Eitt føroyskt fiskiveiðiumboð skal vera umborð á øllum kanningarskipum. Uppgávan hjá umboðnum er at samskifta við fiskiskip og myndugleikar fyri at tryggja, at kanningarvirksemið fer fram við hóskandi atliti til annað virksemi á økinum.

Jarðfeingi kann vísa kanningarfeløgunum á skikkað fiskiveiðiumboð.