2. Reyðibarmur - Jardfeingi

Reyðibarmur í Hvalba

Vegurin gjøgnum Hvalbiarbygd gongur eystur á tunnilin til Sandvíkar. Heldur tú fram eftir gøtuni, sum skilir seg frá vegnum undir brekkuni niðaná, kemur tú út á Reyðabarm.

Reyðibarmur er beint undir tunnilsmunnanum. Tilfarið í bakkanum er leyst gostilfar, alt sum tað er: gosøska, goseyrur, gosbumbur og gosilska, sum eru samanfest til eina gosmyrju. Vit halda, at Reyðibarmur er tvørskurður gjøgnum eina goskluft, sum gekk í útnyrðing-landsynning.
Miðskeiðis í bakkanum er gosmyrjan alreyð. Innskotið blágrýti skjýtur seg her einar 10m upp í hana og greinar seg sundur í erva.
Eystantil á barminum er tilfarið blandað, fínari og grovari hvørt um annað, tað er gráligt ella brúnlitt. Oman á tí er ein royðugrýtislind, og oman á henni aftur eru miðfláirnar.
Inni á sjálvum Reyðabarmi og í innvikunum vestanfyri er møl. Áður var eingin møl her, sjógvurin gekk heilt inn at bakkanum.

Tá ið sprongt bleiv fyri tunnlinum gjøgnum fjallið til Sandvíkar, varð grótavlopið blakað niður í gilið beint upp av barminum, og longu eftir einum tveimum árum lá ein javnbreið malarbrúgv við vælbrýndum malargróti inn við barmin.
Við tunnilsmunnan sært tú oman á Reyðabarm, sum ber navn sítt eftir teirri reyðu gosmyrjuni.