Í 2004 byrjaði verkætlanin við at dagføra landsumfatandi jarðfrøðikortini við nýggjastu vitanina frá rannsóknum og kortlegging seinastu árini.

Tann grundleggjandi vitanin um Føroya jarðfrøði, sum varð borin fram á teim jarðfrøðiligu kortunum í 1969, var grundað á kanningar í meir enn 30 ár. Nú næstan 40 ár eru liðin, er tíðin komin til at tillaga fatanina av føroysku jarðfrøðini og tekna hesar broytingar inn á nýggj kort.


Henda stóra verkætlanin fevnir bæði um prenting av nýggjum jarðfrøðiligum kortum og prenting av ritsavni av greinum um ymisk evni um, hvussu Føroyar vóru til. Nøkur av teimum viðgjørdu evnunum fevna um eldgosini, tey ymsu basaltsløgini, um umhvørvið í gosvirknu tíðini, og ikki minst um, hvussu hetta landaøkið broyttist aftaná, at eldgosini slóknaðu.

Verkætlanin savnar ein part av vísindafólkunum úr Jarðfeingi í Føroyum, GEUS í Danmark, og universitetum í Onglandi. Hesi vísindafólk hava í mong ár arbeitt við jarðfrøðini á landi í Føroyum.


Nýggju kortini og ritgerðin verða eftir ætlan liðug í 2007.