Umboð fyri Jarðfeingi luttóku á 33rd International Geological Congress (IGC) í Oslo frá 6. til 14. august 2008. Hetta er ein vísindalig og kunnandi ráðstevna, sum verður hildin fjórða hvørt ár. Meira enn 6.000 jarðvísindafólk úr 100 londum vóru komin saman í Norges Varemesse miðstøðini í Lillestrøm tætt við Oslo. Hetta var størsta ráðstevnan í Noregi higartil. Haraldur V kongur, verji hjá ráðstevnuni, setti stevnuna.

Jarðfeingi hevði fleiri fyrilestrar og uppslagsframløgur á ráðstevnuni um oljuleiting, landgrunsverkætlanina, tunnilskanningar, landslagsbroytingar og lagskipan í basalti. Ein listi av framløgum og samandráttum er at finna her á heimasíðuni hjá Jarðfeingi.

Á framsýningini GeoExpo 2008 var høvi hjá fyritøkum og øðrum at kunna um sítt arbeiði, sína gransking og sín fakliga kunnleika. Jarðfeingi hevði ein bás, har eitt lítið petti av Føroyum varð víst fram.