SINDRA verkætlanir

Í juni fór Jarðfeingi í samstarvi við universitetið í Aberdeen undir eina tvey-ára langa verkætlan (C46-38-01) við heitinum ”Lava-sediment interaction in near-shore environment: an analogue for offshore exploration”. Verkætlanin verður fíggjað av SINDRA-samtakinum og fevnir um fýra kjarnaboringar í Nólsoy, sum Landsverk borar. Verkætlanin miðar ímóti at skilja samanspælið millum lava- og legugrýti í sjóvarmálaumhvørvi, sum møguligur analogur til líknandi frálandasekvensir. Fyrsta boringin, Tjørnunes-1, er 169 m djúp og varð handað Jarðfeingi seinast í september. Næsta boringin, Høsmøl-1, var við árslok komin niður á 40 m dýpi.

Ein onnur verkætlan fíggjað av SINDRA varð eisini sett í verk á sumri 2008 av starvsfólkum á Jarðfeingi í samstarvi við universitetið í Aberdeen. Hendan verkætlanin hevur heitið: “Volcaniclastic deposits: implications for hydrocarbon exploration”. Verkætlanin miðar ímóti at byggja á eldri kanningar við at kortleggja í minsta lagið tríggjar týdningarmiklar gosgrýtisfláir í Føroyum. Hetta er fyri at skilja flutnings- og leggingarhættirnar, sum virkaðu tá á døgum og møguliga eisini í gosávirkaðum frálandaøkjum.