Jarðfeingi hevur saman við Risø DTU og SEV gjørt eina kanning av hvussu nógv vindorka kann førast inn á føroyska elnetið. Í hesum sambandi hevur Risø DTU gjørt ein teldumyndil av føroyska elkervinum har allar framleiðslueindirnar eru simuleraðar. Niðurstøðan av kanningini er, at elnetið tolir áleið tríggjar ferðir núverandi vindorku og at hendan tískil kann hækkast úr núverandi 4 MW til 12 MW. Ætlanin er at útbyggja teldumyndilin so vind-vatn pumpuskipanir, har vindorka verður umgjørd til stýrbara vatnorku, eisini kunnu kannast við teldusimuleringum. Endamálið er at fáa eina meting av møgulleikunum, ið slíkar skipanir kunnu fáa sum elframleiðandi eindir, og harvið eisini eina meting av møgulleikanum at skerja CO2 útlátið við at gerast minni heft at innfluttari olju til elframleiðslu. Fyribilskanningar, ið Jarðfeingi hevur gjørt av vind-vatn pumpuskipanum, vísa, at hesar hava eitt sera stórt potentiali, um ongar tekniskar forðingar eru í at samanbinda pumpuskipan og vindmyllur.