Oljumálaráðið er farið undir at fyrireika annað loyvisumfar á føroyska landgrunninum. Sum ein liður í fyrireikingunum hevur Jarðfrøðisavnið bjóðað oljufeløgum at vísa á hvørjar teigar, tey ynskja boðin út til leitingar í sambandi við annað loyvisumfar.

Tað er vanlig mannagongd, tá nýggj leitiøki skulu veljast, at oljumyndugleikarnir heita á ídnaðin um vísa á, hvørji øki tey halda vera áhugaverd. Henda mannagongd varð eisini nýtt undan fyrsta føroyska loyvisumfarinum.

Tilmælini frá oljufeløgunum, sum skulu fevna um føroyska økið innanfyri 200 fjórðingar, skulu vera Jarðfrøðisavninum í hendi í seinasta lagi 15. desember 2003.

Oljufeløgini eru í innbjóðingini biðin um at viðmerkja, hvørt teigarnir, tey hava valt, eru roknaðir sum 1) áhugaverdir ella 2) sera áhugaverdir.

Tilmælini verða løgd til grund, tá Oljumálaráðið ger av, hvørji øki verða boðin út til leiting og framleiðslu í øðrum loyvisumfari.

Landsstýrismaðurin í oljumálum, Eyðun Elttør, miðar eftir at lata annað loyvisumfar upp í fyrru helvt av 2004. Loyvi verða eftir ætlan veitt í seinnu helvt av 2004.