Byrjað verður at bora sætta leitibrunnin hesa vikuna.

Jarðfeingi gav fríggjadagin 12. oktober 2007 BP, sum fyristøðufelag í loyvi 007, góðkenning at fara undir leitiboring á landgrunninum.

Pallurin Transocean Rather, sum skal bora brunnin hjá BP samtakinum, er komin í føroyskt sjóøki og byrjar væntandi boringina seinni í hesi vikuni.

BP samtakið hevur loyvi nummar 007, ið fevnir um eitt øki, sum liggur í ein landsynning úr Føroyum. Brunnurin verður boraður á William leitimiðinum á 60° 36’ 58.701’’N og 05° 28’43.540’’ W (datum: ETRS89). Havdýpið á staðnum er 743 metrar MSL.

Kort, ið vísir boristaðið, kann takast niður á hesari heimasíðuni.

Boringin er mett at taka umleið 3 mánaðir.

BP Amoco Exploration (Faroese) Ltd. er fyristøðufelag í samtakinum, ið umframt BP fevnir um Shell og Anadarko.