Orka - Jardfeingi

Orkuhagtøl

Orkudeildin á Jarðfeingi skal í sínum arbeiði miða eftir at røkka tey mál, sum eru sett í álitinum ”Yvirskipaður Orkupolitikkur”. Í hesum áliti, sum Vinnumálaráðið gav út í 2006 stendur, at í 2015 skulu 20% av orkunýtsluni á landi stava frá varandi orku og at í 2015 skal fiskiflotin nýta 15% minni av orku at fiska somu nøgd sum í dag.

Myndin niðanfyri vísir orkuframleiðslu og orkunýtslu í Føroyum í prosentum av samlaðu orkuframleiðsluni, sum er umleið 2800 GWh um árið. Tølini í myndini eru frá 2006, sum er nýggjasta uppgerðin, men geva hóast tað eina góða mynd av støðuni í dag, tí munandi broytingar í orkumynstrinum ikki hava verið seinasta árið.
Tað sæst týðuliga, at tann reyði liturin, sum umboðar olju, er dominerandi. Óhepna og vandamikla støðan, at vit eru sera heft av alsamt dýrari innfluttari olju, hevur nú sett gongd á eitt miðvíst arbeiði at broyta hugburð til orkunýtslu og at menna varðandi orkukeldur.

Sum tað sæst á myndini eru tøl sett á, hvussu stór orkuframleiðslan í landinum er og hvussu nógv ymiskir brúkarabólkar nýta av orku. Endamálið við okkara orkuarbeiði er í stuttum at fáa tann reyða litin (oljuna) at minka so nógv sum gjørligt og samstundis at fáa tann grøna litin (varðandi orka) at taka yvir.

Eitt ógvuliga týðandi amboð í hesum arbeiði er at hava neyv orkutøl og at fáa tey dagførd við passandi stuttum tíðarbilum.
Hagstovan hevur til uppgávu at savna og viðgera orkuhagtøl og á teirra heimasíðu ber til at fáa upplýsingar um orkuframleiðslu og orkunýtslu.
Nú gongd er sett á orkuarbeiði, verður tørvurin á dagførdum tølum nógv størri enn hann higartil hevur verið.
Hagstovan, Umhvørvisstovan og Jarðfeingi hava gjørt ein leist til broytta innsavningar- og viðgerðarskipan av orkuhagtølum. Stovnarnir hava í felag gjørt eina arbeiðsskrá og vænta, at fígging fæst, so arbeiðið kann byrja í næstu framtíð.
Vit síggja fram til at orkuhagtølini verða so væl skipað, at tey veruliga kunnu nýtast í arbeiðinum at flyta orkunýtsluna í Føroyum munandi stig móti varandi orkukeldum.