Ársfrágreiðing 2006

Virksemið hjá Jarðfeingi 2006

Jarðfeingi hevur givið út ársfrágreiðing fyri árið 2006, sum lýsir fjølbroytta virksemið á stovninum. Jarðfeingi er storvnur undir Vinnumálaráðnum við ábyrgd fyri jarðfrøði, orkumálum og oljuleiting.

Munandi partur av virkseminum hjá Jarðfeingi er gransking og kanningar innan jarðfrøði og náttúrulandafrøði. Í 2006 fevndi hesin parturin av virkseminum um m.a. tunnilskanningar, jarðrivskanningar og uppseting av nýggjum jarðskjálvtamátarum. Nógva jarðfrøðiliga granskingarvirksemið í Føroyum verður í løtuni savnað í bók, sum dagførir jarðfrøðiligu Føroyakortini.

Jarðfeingi er jarðfrøðiligt savn við framsýningum og fakligari kunning innan øll fakøkini hjá stovninum. Jarðfrøðiligu framsýningarnar eru í hølum saman við Náttúrugripasavninum á Debesartrøð. Stovnurin er føroyskt tjóðsavn viðvíkjandi jarðfrøðiligum og jarðalisfrøðiligum tilfari, sum eitt nú steinsløg, grótsløg, borikjarnar, kort og teldutøkar dátur.

Jarðfeingi byggir upp fyrisiting og vitanardepil í orkumálum, her dentur verður lagdur á skynsama orkunýtslu og á varandi orkumøguleikar. Í juni 2007 samtykti løgtingið elveitingarlógina. Uppskotið til lógina varð tilevnað í samstarvi millum Jarðfeingi, Vinnumálaráðið, SEV, Røkt og vinnuna. Uppskotið, sum mælir til at økja nýtsluna av varandi orkukeldum og minka orkunýtsluna, hevur verið til politiska viðgerð á løgtingi.

Í 2006 varð fimti brunnurin á føroyska landgrunninum borðaur. Brunnurin fekk navnið 6104/21-1. Eitt av prospektunum æt Brugdan. Avbjóðingin var stór, tá brunnurin skuldi borast. Hetta var fyrstu ferð, at borað varð so langt inni í føroyskum øki, har basaltfláirnar eru tjúkkar. Rakt varð við spor av gassi, og tøkniliga var hetta ein væleydnað boring, sum vísti á hættir at minka um forðingarnar at bora á basaltøkinum.

Jarðfeingi skipaði fyri oljuráðstevnu í september 2006 við heitinum FIEC, Faroe Islands Exploration Conference. Ráðstevnan savnaði hópin av jarðfrøðingum og jarðalisfrøðingum úr øllum heimi at viðgera nýggj úrslit kring oljuleiting í basaltøkjum. Fyrilestrarnir verða útgivnir í bók í næstum.

Ársfrágreiðingin hjá Jarðfeingi fæst við at venda sær til Jarðfeingi ella sum skjal á heimasíðuni her

Petur Joensen, stjóri